පුඩිමක් හදන අලුත්ම විදියෙ රෙසිපියක්

"මාරයාගේ හෝරාව" මාර සරණිය කියල, කෑම හදන හැටි කියල දෙනව. "කතන්දර" බ්ලොග් එකෙත් ලඟදි කෑම ජාති කීපයක් හදන හැටි කියල දුන්න. මාත් කල්පනා කලා, කාලෙකට ඉස්සෙල්ල ඉගෙනගත්ත, පුඩිමක් හදන අලුත්ම විදියෙ රෙසිපියක් ඉදිරිපත් කරන්න.

අපේ අසල්වැසියො  කට්ටියක් එකතු වෙලා, පෝය දවසෙ පංසලේ වැඩ ඉන්න ස්වාමීන් වහන්සේලට, වෙනදට වඩා සුපිරි විදියට දානයක් පිරිනමන්න තීරණය කළා. හැම ගෙදරින්ම වගේ දානයේ වගකීම භාර ගත්ත. ඒ කියන්නෙ බත් ජාති කීපයක්, මාළු පිනි, අතුරුපස විතරක් නෙමේ, පිරිකර පවා එක එක ගෙදරින් භාරගත්ත. මම අඳුනන එක ගෙදරකින් භාර අරන් තිබුනෙ අතුරුපස සඳහා පුඩිමක්. දැන් ඔය පිරිකර ඇරෙන්න අනිත් හැම ජාතියක්ම ස්වාමීන් වහන්සේලට විතරක් නෙමේ දානෙට සම්භන්ද වෙන ඔක්කොටම ඇති වෙන්න පිළියෙළ කරන්න ඕනෙ. පුඩිම භාර ගත්ත ගෙදර නෝන මහත්තය කට්ටියටම ඇතිවෙන්න ලොකු පුඩිමක් කලින් දවසෙ හවසම හදල, ෆ්‍රිජ් එකේ දාල තිබ්බ. මේ පුඩිම හදපු රෙසිපිය මට කිව්වෙ, පුඩිම හදපු නෝනගෙ, මහත්තය.

දානෙ දවසෙ පුඩිමත් අරන් පන්සල් යන්න දෙන්න දෙමහල්ලො ලෑස්ති වුනා. දන්නවනෙ ඉතින්, යන්නෙ පන්සල් වුනත් කාන්තා පාර්ශවේට ගෙයින් එලියට බහින්න ලෑස්තිවෙන්න ගතවෙන කාලය, පුරුෂ පක්ෂෙට වඩා ටිකක් වැඩිය් කියල. මේ ගෙදරත් ඉතින් වෙනසක් නැහැ. මහත්තය කලිසමක්, කමිසයක් ඇඳගෙන රෙඩි වෙලා නෝන ලෑස්ති වෙලා එනකන්, මොකටද නිකරුනේ කාලෙ නාස්ති කරන්නෙ කියල, පත්තරේ දිග ඇරගත්ත. ඔය අතරෙ නෝන මහත්තය ලෑස්ති වෙලා ඇවිල්ල කලින් දවසෙ ෆ්‍රිජ් එකේ දැම්ම පුඩිම එලියට අරගන්නව, පත්තරේ බලමින් හිටියත් මහත්තයට දැනුන. සුළු වෙලාවක් නිශ්ශබ්දතාවයෙන් ගත වුනා. ඊට පස්සේ නෝන මහත්තය කා එක්කද ටෙලිෆෝන් සාකච්චාවක් පටන් ගත්ත. පන්සලට යන්න තව කාල වෙලාව ඇතිවෙන්න තිබුන නිසා මහත්තය ඒ ගැන වැඩිය කලබල වුනේ නැහැ.

පත්තරේ කියෝන මහත්තයට ඇහෙන්නෙ සාකච්චාවෙ එක පැත්තක් විතරය්. ඒත් තේරෙනව, නෝනගෙ සාකච්චාව යන්නෙ අසල්වැසි නෝන කෙනෙක් එක්ක කියලත්, කතා වෙන්නෙ වැරදිච්ච පුඩිමක් ගැන කියලත්, නෝනල දෙන්න හොයන්නෙ වැරදුනේ කොතනද, ඒක නිවැරදි කරන්න විදියක් තියෙනවද, ආදී කරුණු කියල. එක අවස්තාවක නෝන කියන්න පටන් ගත්ත, පුඩිම හදනකොට ඒකට පාවිච්චි කල දේවල්. මහත්තය සූප සාස්තරේ ගැන වැඩි යමක් දන්නෙ නැති වුනාට, පොරට තේරුනා නෝන පුඩිමට අත්‍යාවශ්‍යම අමු ද්‍රව්‍යයක් අමතක කරල කියල.

මේ යකාටත් කට පියාගෙන ඉන්න බැරි ලෙඩක් තියෙනවද කොහෙද. මෝඩය වගේ අහපි "ඉතින් ඕකට බිත්තර දැම්මෙ නැද්ද" කියල.