කන්දක් විළිලා, කෙන්දක් වැදීම

ටෙලි ඩ්‍රාමා එකක් බලන්න ගිහින්, 2011 දෙසැම්බර් අන්තිමට ලියපු පොස්ට් එක ඉවර කරන් නැතුව මගදි නවත්තන්න වුනානෙ. ඉතුරු හරිය ලියන්න ඉස්සෙල්ල කොමෙන්ට් වලින් දැක්ක දෙයක් තමා, වෙජිටේරියන් වගේම, මාළු විතරක් කන අයත් , ඒවගේම ගවමස් නොකන අයත් බොහෝ දෙනෙක් ඉන්න බව. ඒ නිසා චිකන් සහ මාළු වගේම එළවලු වලිනුත් මේ 'ස්ටර් ෆ්‍රයි' එක හදන්න පුළුවන් කියල පෙන්නල දෙන්නත් හිතුන මේ ගමන්ම.

උඩින්ම තියෙන පින්තුරෙන් පෙන්නල තියෙන්නෙ මම ඒකට ගත්ත 'ඇට්ලෑන්ටික් සැමන් ' කියන මාළු ග්රෑම් 500 ක විතර ප්‍රමාණය. ඔය විදියම, රතු පාට, රසත් ලොකු වෙනසක් නැති, ' ටැස්මේනියන් සැමන් ' කියල වර්ගෙකුත් මෙහෙ තියෙනව. ලංකාවෙ නං මේ වැඩේට තෝර, බල, කෙලවල්ල, තලපත් එහෙමත් නැත්තන් මෝර වගේ මාළු ජාතියක් වුනත් පාවිච්චි කරන්න පුළුවන්. ' තෝර බලයි ' වුනත් ප්‍රශ්නයක් නෑ.

මාළු පිළිබඳව යමක් කමක් ඉගෙන ගන්න අවශ්‍ය අය, අහන්න ඕනයගෙන්.


 

විශේෂ ඉල්ලීමක්

සිංහල බ්ලොග් ලෝකෙ,   මාළු පිළිබඳව එකම විශේෂඥය වන, 'ඕනයගෙ' බ්ලොග් එකට යන්න පුළුවන් මෙතනින්. මේ ලින්ක් එක හරහ ගිහිල්ල,  පෝස්ට් එක නොකියෙව්වත්, ඒකෙ වැටිල තියෙන කොමෙන්ට් පළවෙනි එකේ ඉඳලම කියවල කොමෙන්ට් එකත් දාල ගියොත් මගේ අවංක ස්තුතිය ඔබට.

දැන් බහිමු වැඩේට.

ඉස්සෙල්ලම අවන් එක සෙන්ටිග්‍රේඩ් අංශක 250 කට විතර රත් කර ගන්න. හරක් මස් කුට්ටිය අවන් එකේ විනාඩි 45 ක් විතර බේක් කර ගන්න. එහෙම කලාම ලැබෙන්නේ මෙන්න මේ වගේ මස් කුට්ටියක්.

දැන් මස් කුට්ටිය තමන් කැමති ගන කමට පෙති වලට කපල, ඒ පෙති කැමති බයිට් සයිස් එකට කපා ගන්න. පහලින් තියෙන්නෙ මං කපා ගත්ත විදිය.

ගෙදර තියෙන සෝස් ජාති ඔක්කොගෙන්ම මේස හැන්ද ගානෙ භාජනේකට දාල කහ කුඩු තේ හැඳි බාගෙකුයි, ගම්මිරිස් කුඩු තමන් කැමති ප්‍රමානෙකුයි ඒකටම දාන්න. කපා ගත්ත මස් ටිකත් ඒ බාජනේටම දාල හොඳට අතගාල, වහල, පැත්තකින් තියන්න. [කැමති ප්‍රමාණයක් ලුනුත් දාගත්තට කමක් නෑ, මං නං ලුනු දැම්මෙ නෑ, සෝස් වල ලුණු, විතරක් නෙමේ, විනාකිරිත් තියෙන නිසා]

ඉස්සෙල්ල පෝස්ට් එකේ, මම සඳහන් කරපු එළවලු, ළුනු, එහෙම මතකනෙ. ඒ එළවලුම නැති වුනත් ඒ වගේ එළවලු ජාති තමන් කැමති විදියට කපා ගන්න. මස් ග්රෑම් 500 න් හදනව නං ඔක්කොම ජාති එලවලුත් ග්රෑම් 500 - 600 කට වඩා වැඩි කරන්න එපා. හැබැයි තමන් කැමති එළවලු වැඩියෙනුත්, වැඩිය කැමති නැති ඒව අඩුවෙනුත් ගත්තට ප්‍රශ්නයක් නෑ.

මස් සහ එළවලු ඔක්කොම දාන්න පුළුවන් සයිස් ෆ්රයින් පෑන් එකක් ලිපේ තියල ඒකට බටර්, මාජරින් හෝ ඕනෙම කන්න පුළුවන් මේධයක්, මේස හැඳි දෙකක් දාන්න. ගින්දර ෆුල් වැඩි කරන්න එපා. තෙල් රත් වෙනකොට අබ තේ හැඳි බාගයක්, කෑලි මිරිස් මේස හැන්දක් [මිරිස් තමන් කැමති විදියට අඩු වැඩි කොර ගත්තට කමක් නෑ] රම්පෙ, සේර, කරපිංච, දෙකට හෝ තුනට පලපු සුදු ළුනු බික් තුනක් විතර දාල අබ ටික ඩාන්ස් දාන කන් රත්වෙන්න අරින්න. ආ..අමු මිරිස් කරලකුත් හීනියට ලියල දැම්මට කමක් නෑ, තලාගත්ත පොඩි ඉඟුරු කෑල්ලක් එක්ක. ඔය ටික රත් වෙන වෙලාවට එන්නෙ නියම සුවඳක්.

ඉස්සෙල්ලම ලිපේ තියෙන භාජනේට දාන්න කපාගත්තා කැරට් ටික.

බෝංචි එහෙමත් තියෙනව නං ඊගාවට දාන්න. දැන් අනිත් එළවලු තියෙන ඒව දාන්න. ඊටපස්සෙ මස් ටික දාල, මස් විනාඩි දෙකක් රත් වෙන්න අරින්න. 

අන්තිමට හතු ටිකත් දාල භාජනේ වහල, ගින්දර නිමල විනාඩි තුන හතරක් තියෙන්න අරින්න. ඊට පස්සෙ ඔක්කොම කලවන් වෙන්න හැඳි ගාන්න.

දැන් බඩු රෙඩි. වැඩේ සිම්පල් නේද?

මෙන්න 'එන්ඩ් ප්‍රොඩක්ට්' එක.

මම කුකුල් මස් සහ මාළු කපන්නෙ මෙන්න මේ ප්‍රමානෙට.

කුකුල් මස් හෝ මාළු ' ස්ටර් ෆ්‍රයි ' කරනව නම් එළවලුත් එක්ක එකටම දාල ෆ්‍රයි කරගන්න.

කුකුල් මස් හෝ මාළු වලින් 'ස්ටර් ෆ්‍රයි' එක හදනව නම් අවන් එකේ බේක් කරන්න අවශ්‍ය නැහැ, හැබැයි කටු නැතුව ගත්තොත් තමා හොඳ.

වෙජිටේරියන් අයට, මස් මාළු නැතුව, මේ විදියටම ' වෙජිටබල් ස්ටර් ෆ්‍රයි ' එකක් කරදරයක් නැතුව හදා ගත්තෑකි.

කොයි විදියට හැදුවත් හතු අන්තිමට දාන්න.

මේක ඔය පොඩ්ඩක් අනුමත වෙන කට්ටියට ' බයිට් ' එකක් හැටියටත් හොඳයි.