කක්ක පෙරේරා

මම කුරුණෑගල ලංගම ප්‍රාදේශීය වැඩපොළේ වැඩ කරන කාලෙ ඒ වැඩපොලේම වැඩ කරපු චරිතයක් පෙරේරා. ලංගම මම පුහුණුව ලබපු වේරහැර ආයතනෙම, මට අවුරුදු කීපෙකට පසුව පුහුණුව ලබපු පෙරේර මේ කියන කාලෙ සේවය කලෙත් කාර්මික අංශයේ. පෙරේර ඒ කාලෙ හිටියෙ වැල්ලව පොළට කිට්ටුව, අනාගත බිරිඳ කාන්තිගෙ ගෙදර. එකට හේතු වුනේ, එයාලගෙ ප්‍රේමයට පෙරේරගෙ දෙමව්පියන් සහ සහෝදර, සහෝදරියන්, බලවත් ලෙස විරුධත්වය පෑම.

පෙරේරගෙ පෙම්වතියගේ ගෙදර, ඉස්සර අපිත් අඩියක් එහෙම ගහන්න සෙට් වෙන තැනක්. නැන්දම්මයි, මාමණ්ඩියි, හරිම හොඳ මිනිස්සු. අපි සෙට් වෙන වෙලාවට බයිට් එකක් හදල දෙන්න, කෑම ටිකක් උයල දෙන්න හෙම කවදාවත් පස්ස ගැහුවෙ නෑ. අපි එහෙ නයිට් පාක් ගැහුවොත්, පහු වෙනිද උදේට වැඩට යනකොට ගෙනියන්න ගින්නෙන් තවපු කෙහෙල් කොලේක ඔතපු, මතක් වෙනකොට දැනුත් කටට කෙල උනන, බත් මුලක් කවදාවත් වැරදුනේ නෑ.

මම කුරුණෑගල ඉන්න කාලෙම, පෙරේර කාන්තිව විවාහ කර ගත්ත. වෙඩින් එකයි හෝම්කමින් එකයි එකම දවසෙ. හෝම්කමින් එකක් ගන්න හනිමූන් යන්න එපෑ. අවුරුදු ගානක් එක ගෙදර ඉඳල උන්ට හනිමූන් යන්න අවශ්‍යතාවක් තියෙන්න නැතුව ඇති. දවල් මඟුල් ගෙදර නියමෙට තිබ්බ. අපි ඉතින් කලින් දවසෙ ඉඳල එහෙ, වැඩට උදව්ව කොහොම වෙතත් යාළුවො නියමෙට පෙරේරගේ අන්තිම බැචුලර් දවස සෙලිබ්රේට් කළා. ඒ කාලෙ Stag පාටි කියන ඒව නං අපි අහළවත් තිබ්බෙ නෑ. මගුල් දවසෙ නෑදෑයො හිටියෙ නං කාන්තිගෙ පාර්ශවෙන් විතරයි. එදාම රෑ තිබුන 'ඇස්ටෝන් ' පාටිය. ඒකට වැඩි හරියක් සහභාගි වුනේ ගමේ අහල පහළ කට්ටිය. ලංගම යාළුවො ටික ඒකටත් සහභාගි වුනා විතරක් නෙමේ, එදා නයිටත් එහෙ.

පෙරේර විවාහ වෙලා කාලෙකට පස්සේ, මැද පෙරදිග රැකියාවකට ගියා. අන්තිම වතාවට හමුවෙනකොට විශ්ව විද්‍යාලේ ඉගෙන ගන්න දියණියකගෙ පියෙක්. එක්සත් ජාතීන්ගෙ සංවිධානය මගින් දියුණු වෙන රට වල පවත්වාගෙන යන කාර්මික විද්‍යාල වල, විශේෂඥ උපදේශකයෙක් හැටියට ආසියාවෙ සහ අප්‍රිකාවේ රටවල සේවය කරන්නෙ.


මං මේ කියන්න යන සිද්ධිය වෙලා තියෙන්නෙ, පෙරේර බඳින්න ඉස්සෙල්ල, පිස්සු කෙලින කාලෙ. ඒ දවස් වල මෑන් වැඩ කරල තියෙන්නෙ, උඩුබද්දාවෙ  තිබුන ලංගම වැඩපොළක. ඒකත් කුරුණෑගල ප්‍රාදේශීය වැඩපොලේම ශාඛාවක්. ඕනෙම මාසෙක 8 වෙනිද කියන්නෙ, ලංගම ඉංජිනේරු අංශෙ කට්ටියගෙ අවුරුදු දවස. වෙන විධියකට කිව්වොත් පඩි දවස. මේ කියන පඩි දවසෙ පෙරේර යාළුවො කට්ටියක් එක්ක සෙට් වෙලා හොඳට අනුමත වුනාලු.  උඩුබද්දාව පැත්තෙ කට්ටිය ක්ලබ් වල, බාර් වල, රෙස්ටොරන්ට් වල, සෙට් වෙන්නෙ කළාතුරකින්.  හේතුව දංකොටුව පැත්ත වගේම, ඉස්තරන් විදියට පෙරාපුව උඩුබද්දාව පැත්තෙ හොර ස්පොට් වල ලාබෙට තියෙන හින්ද.

හොර පොට් එකෙන් පටන් ගත්ත වැඩේ ඉවර වෙලා තියෙන්නෙ, තව බෝතලයක් දෙකකුත් අරං ඒ පැත්තෙම එක යාළුවෙකුගෙ ගෙදර. ගෙනාපු බෝතලුත් ඉවර කරන ගමන් සින්දුවක් දෙකකුත් කියල, යාළුවගෙ ගෙදරින් උයල දුන්නු කෑමත් රෑට සප්පායන් වෙලා යාළුවො ටික නිදා ගන්න සෙට් වුනාලු.  ගෙයි සාලෙ පැදුරු එලාගෙන තමා කට්ටිය නිදාගෙන තියෙන්නෙ. දාඩිය දානව, ඒක නිසා හුළං ටිකක් වදින්නත් එක්ක කියල පෙරේර පැදුරකුත් ඉල්ලගෙන ගෙදර ඉස්තොප්පුවෙලු නිදා ගත්තෙ.

රෑ ගානට අනුමත වෙලා පරක්කු වෙලා එහෙම නිදාගත්ත නිසා කට්ටියට ඇහැරෙන කොට  එළිය වැටිලලු හොඳට. අනික් අය දත් මදින්න කුස්සියෙන් අඟුරු කෑලි එහෙම ඉල්ලගෙන එළියට එනකොටත් පෙරේර තාම නිදිලු. යාළුවො ටික පෙරේරව අවදි කරගෙන ලිඳ ගාවට යන්න මිදුලට බහින කොට,  මිදුලෙ මහ විසාල කක්ක බෙට්ටක්ලු. යාළුවො එකිනෙකාගෙ මූන බලද්දි පෙරේර කිව්වලු  ' බල්ලෙක්ද කොහෙද මිදුලෙ කැත කරල '  කියල.

ඉස්තෝප්පු කාමරේ නිදාගෙන හිටිය යාළුවගෙ තාත්ත ඒ වෙලාවෙ දොර ඇරගෙන එළියට ඇවිල්ල කිව්වලු  ' ඔව් ඒ බල්ල ලිඳ ගාවට ගිහින් වතුර බාල්දියක් ඇදන් පුකත් හෝදගත්ත '  කියල.

එදා ඉඳල අද වනතුරු, පෙරේර නිකංම පෙරේර නෙමේ,  'කක්ක පෙරේර '