මහ විසාල පීසා එකක්

චායාරුපය ගුගල් ෆ්‍රී ෆොටෝස් වෙතින්

අවුරුදු විස්සකට විතර ඉස්සර, අපි පර්ත් වලට සංක්‍රමණය කරන වකවානුවෙ, බෞද්ධ විහාරස්ඨාන තුන හතරක් තිබුන මෙහෙ.  එයින් එකක් පර්ත් නගරෙ ඉඳල කි.මී. හැට,හැත්තෑවක්, විතර දුරින් පිහිටවල තිබුන ආරණ්‍ය සේනාසනයක්. ඒ ආරණ්‍ය සේනාසනේ ශාඛාවක් වගේ පන්සලක් නගරයෙම පිහිටවල තිබුන.  ඔය දෙක තමා මම දන්න තරමින්, අපි අදහන ථේරවාදී බෞද්ධ පන්සල් වශයෙන් තිබුනෙ. අනිත් ඒව චීනෙ වගේ රටවල් වලින් සංක්‍රමණ වුනු අය අදහන, මහායාන බෞද්ධයන් වන්දනා මාන කල පන්සල්. ඔය මම සඳහන් කල පන්සල් වලට අමතරව පසු කාලෙක, වහලෙට රත්තරන් පාට එහෙම ගාපු, තවත් විශාල මහායාන පන්සලක් පර්ත් නගරයට නුදුරින් ඉදි වුනා. ඒ කාලෙ ඔය එකම පන්සලකවත් ලංකාවෙන් ආව සිංහලෙන් ආගමික කටයුතු කරන ස්වාමීන් වහන්සේ නමක් හිටියෙ නැහැ. පසු කාලෙක එවැනි ස්වාමීන් වහන්සේලා දෙනමක් වරින් වර, කලින් සඳහන් කල ආරණ්‍ය සේනාසනේ වැඩ වාසය කළා. ඔය පන්සල් වලට අමතරව, ථෙරවාදී භික්ෂුනීන් වහන්සේලාට "ගිජිගිනප්” කියන පළාතෙ ඉදිවුන නව ආරණ්‍ය සේනාසනයකුත්, තවමත් බටහිර ඔස්ට්‍රේලියාවෙ බෞද්ධයන් පවත්වගෙන යනව.

ලංකාවෙන් සංක්‍රමණය වුනු බෞද්ධ සැදැහැවතුන් පිරිසක් එකතු වෙලා, දැනට අවුරුදු පහළොවකට විතර ඉහතදී, අලුතෙන් පන්සලක් පිහිටව ගත්ත.  අලුත් පන්සලට ගොඩනැගිල්ලක් තිබුනෙ නැහැ, ඒ වකවානුවෙ, කුලියට ගත්ත නිවසක තමා පන්සල පිහිටෙව්වෙ.  තණකොළ කපන මැෂිම, අනෙත් ආයුධ උපකරණ එහෙම, පරෙස්සමට ඉබ්බෙක් දාල ආරක්ෂා සහිතව තියන්න පුළුවන්, ඔස්ට්‍රේලියාවෙ  "ගාර්ඩ්න් ෂෙඩ්" කියල හඳුන්වන මඩුවක් ප්‍රධාන ගෘහය පිටුපස්සෙ තිබුන.  මේ  "ගාර්ඩ්න් ෂෙඩ්" ඒක ශුද්ධ පවිත්‍ර කරල, තීන්ත ගාල එහෙම, බුදු ගේ හැටියට භාවිතයට ගත්ත.  දාන ශාලාව, ලැගුම් ගෙය, සැදැහැවතුන්ගේ රැස්වීම් ශාලාව, ආදී මෙකී නොකී කටයුතු ඔක්කොටම පාවිච්චි කලේ ප්‍රධාන ගෘහය.

"ටුවරිස්ට් වීසා" එකකින් ලංකාවෙන් තාවකාලිකව වැඩම කරව ගත් ස්වාමීන් වහන්සෙ නමක් ඒ කාලෙ අපේ සිංහල, බෞද්ධ, පන්සලේ වැඩ වාසය කලේ. ඉතින් වීසා එක ඉවර වෙන කාලෙ වෙනකොට, ස්වාමීන් වහන්සෙ ආපහු ලංකාවට වැඩම කරන්න ඕනෙ. ඔය අතරතුරේ පන්සලේ සමිතියෙන් ස්පොන්සර් කරල වෙනත් ස්වාමීන් වහන්සේ නමක් පර්ත් වලට වැඩම කරව ගන්නවා. පසු කාලෙක ඕස්ට්‍රේලියන් රජයට කරුණු ඉදිරිපත් කරල, සෑහෙන උත්සාහයකින් පස්සෙ, භික්ෂුන් වහන්සෙ නමක් ස්ථිරවම පර්ත්, සිංහල බෞද්ධ විහාරස්තානයට වැඩම කරව ගන්න අපේ සැදැහැවතුන් සමත් වුනා. ඊට ඉස්සෙල්ල ඉතින් ස්වාමීන් වහන්සේල මාස තුනකට හෝ හයකට සැරයක් වෙනස් වුනා, වීසා ලැබිල තිබුන විධියට. සමහර අවස්ථා වල ආගමනය සහ විගමනය ඕවර්-ලැප් වීමෙන් ස්වාමීන් වහන්සේල දෙනමක් වැඩ සිටිය අවස්ථා මෙන්ම, එකම ස්වාමීන් වහන්සෙ පර්ත් විහාරස්තානයට එක වාරෙකට වඩා වැඩම කල අවස්තාවනුත් තිබුන.

වර්තමාන සිංහල, බෞද්ධ විහාරස්ථානය මම ඉස්සෙල්ල සඳහන් කල තත්වයට වඩා හුඟාක් ඉදිරියෙන්. පන්සලටම අයත් භූමියක, අලුතින් ඉදිකළ යහමින් ඉඩකඩ තියෙන රැස්වීම් ශාලාවක් හැටියටත් භාවිතා කල හැකි විහාර ගෙයක්, දාන ශාලාවක්, මුළුතැන් ගෙයක් ආදී සියලුම පහසුකම් ඇරුනම සෑහෙන්න විශාල කාර් පාර්ක් එකකිනුත් සමන්විතය්. ලංකාවෙන් වැඩම කරව ගත්ත බෝධි අංකුරයත් දැන් ටිකක් උස ගිහින්.  අල්ලපු වැටේ තිබුන නිවස විකුනන්න දාල තියෙනවා දැකල, පන්සලේ සමිතිය, භික්ෂුන් වහන්සේලාට ලැගුම් ගෙය හැටියට ඒ නිවස මිලට ගත්ත. දැනට ස්ථිරව පන්සලේ වැඩ වාසය කරන, ගරුතර නායක ස්වාමීන් වහන්සේට අමතරව, බොහෝ වෙලාවට ලංකාවෙන් තාවකාලික වශයෙන් වැඩම කරන ස්වාමීන් වහන්සේල එක්කෙනෙක් හෝ දෙන්නෙක් බොහෝ වෙලාවට පර්ත් පන්සලේ වැඩ වාසය කරනව.

පන්සල ආරම්භ කල කාලෙ, පන්සලට යන එන අය හිටියෙ බොහොම අඩුවෙන්. දාන භාර ගත්ත අයත් කලින් දවසේ හවස හීල් දානෙය්, දවල් දානෙය්, ගෙනල්ල පන්සලේ ශීතකරණය ඇතුලෙන් තියල යන එක තමා හුඟක් වෙලාවට කලේ. දවල් දවසේ හැමෝම වැඩ නිසා ඒ ගැන ඉතිං දොසක් කියන්නත් බැහැ. දානෙ රත් කරගෙන වළඳන්න අවශ්‍ය මය්ක්රොවේව් අවර්න් එකක් එහෙමත් පන්සලේ තිබුන. සෙනසුරාද ඉරිදා දවස් වලට පන්සලේ වැඩම කරල ඉන්න ස්වාමීන් වහන්සේව නිවසටම වඩම්මල දානෙ පිලිගන්නන්න බොහෝ දෙනෙක් උනන්දු වුනා.

එක කාලයක්, කියවන්න ලියන්න උනන්දුවක් තියෙන ස්වාමීන් වහන්සෙ නමක් අපේ මේ පන්සලේ තාවකාලිවකව වැඩ වාසය කළා. ගෙදර තිබුන පොත්පත් ගිහින් දුන්නට අමතරව, බොහෝ දිනවල වැඩ ඇරිල එන ගමන් හාමුදුරුවන්ට කියවන්න පත්තරේ ගෙනත් දීල, ටික වෙලාවක් කතා කරමින් ඉඳල එන්නත් මට පුරුද්දකට ගියා. ඒ කටයුතු වලින්  හාමුදුරුවො එක්ක සෑහෙන මිත්රත්වයකුත් ගොඩ නැගුන,  එක සෙනසුරාද දවසක අපේ මල්ලිලගේ ගෙදරට හාමුදුරුවො වඩම්මල දානයක් පිරිනමන්න ඒ පවුලෙ උදවිය සුදානම් කරල තිබුන. පොඩි වුනාට දානෙ වැඩ කටයුතු වලට මල්ලි ගෙදර ඉන්න ඕනෙ නිසා මම භාරගත්ත, හාමුදුරුවො වඩම්මන භාරධුර රාජ කාරිය.

මම ඉතිං වෙලාවට පන්සලට ගිහින්, ස්වාමීන් වහන්සේව කාර් එකට නග්ග ගත්ත. කාර් එකේ යන ගමන් දෙබස.

හාමුදුරුවො       :- හරි වැඩේනෙ මහත්තය ඊයේ වුනේ

මම                     :- ඇය් හාමුදුරුවනේ, මොකද වුනේ?

හාමුදුරුවො       :- ඊයේ හීල් දානෙට ගන්න, පෙරේද රෑ සරත් මහත්තය ගෙනත් දුන්නනෙ මහ විසාල පීසා එකක්

මම                     :- ඉතිං හාමුදුරුවනෙ පීසා වළඳන්න අකමැති නිසා බඩගින්නෙ ඉන්නවත් වුනාද?

හාමුදුරුවො        :- නැහැ..නැහැ...මය්ක්රොවේව් එකේ දාල රත් කරගෙන වැළඳුව

මම                      :- එහෙනං මොකද්ද ප්‍රශ්නෙ හාමුදුරුවනේ?

හාමුදුරුවො        :- මට ඊයේ දවස පුරාම පාචනේ හැදිලා හිටියෙ මහත්තය ඒ පීසා එක වළඳල

පොඩ්ඩක් විතර ටියුබ් ලයිට් වෙලා තමා මට වැඩේ මීටර් වුනේ. දන්නවනෙ  අපේ  සිංහල බෞද්ධයො, පන්සලකට දානෙකට පුජ කොරන වෙලාවට හොඳම එකනෙ පුජ කොරන්නෙ.  සරත ගිහින් දීල තියෙන්නෙ අඟල් දහසයක විෂ්කම්භය තියෙන, ස්ලයිස් අටේ, තඩි ෆැමිලි පීසා එකක්. අපේ හාමුදුරුවොත් නොදන්න කමට, පුජ කොරපු එක අහක දාන්නෙ නැතුව මුළු පීසා එකම වළඳල, ඉස්පිටිතාලෙන් මෙහා නවතිච්ච එක ලොකු දෙයක් කියලය් මට නං හිතුනෙ.

නිවසේදීම පීසා හදා ගත හැකි පොඩි පීසා අවර්න් එකක්

.

පීසා සමග එකට යන බීමක්