කවද්ද පර්ත් යන්නෙ.....?

මං මේ කියන මනුස්සය ලංකාවෙ සෑහෙන්න ප්‍රසිද්ධ ගත් කතුවරයෙක්. දිගු කාලයක් අගනුවර ප්‍රධාන බෞද්ධ පාසලක ගුරුවරයෙක්ව ඉඳලත් තියෙනව. මගෙ මතකෙ හැටියට ගුරු වෘතියෙ ඇරුනම, රජයේ වෙනත් ආයතන වලත් සේවය කරල තියෙනව. විශ්‍රාම ගත්තට පස්සෙ දැන් පදිංචි වෙලා ඉන්නෙ ඔස්ට්‍රේලියාවෙ මෙල්බර්න් නුවර. මේ ගුරු පියාණන් ගෙන් ඉගෙන ගත්ත අය මුළු ලොව පුරාම පැතිරිලා ඉන්නවා කිව්වොත් අතිශෝක්යක් නෙමේ. දැනටත් විශ්‍රාමිකයෙක් කියන්න බැහැ මේ පුද්ගලය, තවමත් පොත් පත් ලියල ප්‍රසිද්ධ කරනව ඇරුනම, ඔස්ට්‍රේලියාවෙ සිංහලෙන් පල කෙරෙන පුවත්පත් වලට ලිපි ලිවීම සහ එම පුවත්පත් පල කිරීමේ කාර්යභාරයට සෑහෙන්න උර දෙන කෙනෙක්.

මේ විශ්‍රාමිකයෙක් නොවන, විශ්‍රාමික ගුරු පියාණන්ගෙ , අර මං කලින් සඳහන් කල අගනුවර ප්‍රධාන බෞද්ධ පාසලේ ගෝලයෙක්, ඔස්ට්‍රේලියාවෙ පර්ත් නගරයේ ප්‍රධාන විශ්ව විද්‍යාලයක (මම දන්න විධියට) ෆැකල්ටියක් භාර මහාචාර්ය වරයෙක්. ඒ පුද්ගලයා ගැනත් සුළු විස්තරයක් කිව්වොත්, මෑන්ස් පර්ත් වල ලාංකිකයන් අතර කැපී පේන්න වැඩ කරන, ඒ වගේම සමාජයේ ඉහල තැනක ඉන්න පුද්ගලයෙක්. සමාජ සේවා කටයුතු, ඒ වගේම සිංහල, බෞද්ධ, කියන සමිති සමාගම් වල නිල තල එහෙම දරන් ඉන්නෙ, අවරුදු විස්සකට වැඩි කාලෙක ඉඳල කියල මං හොඳටම දන්නව. මම මෙහාට සංක්‍රමණය වෙනකොටත් මේ කියන මනුස්සය සිංහලෙන් කිව්වොත්, "සෑහෙන පොරක්". හැබය් තව එකක් කියන්න ඕනෙ, ඕනෙම නැගල යන පොරකට වගේ මේ මෑන්ස්ටත්, ඒ කාලේ ඉඳලම ඊර්ෂියා කාරයන්ගෙන් වෙන්නැති, කතා හැදිල තිබුන. දන්නැද්ද අපේ කෂ්ටිය ඊර්ෂ්‍යාවට කියන කතා, බොරු ශෝභන කාරයා, තමන්ගේ වාසියට වැඩ කරන එකා, අරව මේව.

ඉතින් අපේ පර්ත් මහාචාර්ය තුමා, සම්මන්ත්‍රණයක් හරි මොනවා හරි රාජකාරියකට මෙල්බර්න් ගිය වෙලාවක අහම්බෙන් තමන්ගෙ ගුරුතුමා හමු වුනා. දෙන්නටම හරිම සන්තෝශය්. ඉතින් දෙන්නත් එක්ක ආපන ශාලාවකට ගිහින් කෝපි කෝප්පයක් බොන ගමන් දෙන්නගෙ ආගිය තොරතුරු කතාවුනා. වෙන් වෙලා යන්න ඉස්සෙල්ල ගෝලය ගුරුතුමාට කිව්වා තව දවස් දෙකකින් එයා ආපහු පර්ත් යනවා, ගිය ගමන් සර්ට එයාර් ටිකට් එකක් එවනව පර්ත් ඇවිල්ල යන්න, පර්ත් වල ඉන්න සුමාන දෙක එයාගෙ ගෙදර ඉන්න පුළුවන්, පර්ත් නගරෙ විතරක් නෙමේ බටහිර ඔස්ට්‍රේලියාවෙ බලන්න තියෙන තැන් ඔක්කොටම එක්ක යනව, ඉන්න සුමාන දෙකේ විය හියදම් ඔක්කොම එයාගෙ ගානෙ කියල. අන්න දැක්ක නේද ආදර්ශමත් ගෝලයො, ගුරුවරුන්ට සළකන්නෙ තමන්ගෙ දෙමව්පියන්ට වගේ. බටහිර ඔස්ට්‍රේලියාව පුරා කෙනෙක්ව එක්ක යනව කියන්නෙ ලේසි කෙළියක් හෙම නෙමේ, මුළු රටෙන් බාගෙකට චුට්ටය් අඩු භූමි ප්‍රමාණෙන්, වැඩි හරියක් යන්න තියෙන්නෙ අහස් යාත්‍රා වලින්, කාර් එහෙකින් යන්න බැරි කොමක් නැතුව නෙමේ, හැබය් සුමාන දෙකෙන් නං බැහැ. අනික මෙල්බර්න් ඉඳල පර්ත් වලට රිටර්න් එයාර් ටිකට් එකත් සෑහෙන ගානක්, මට මතක විධියට පැය පහකට කිට්ටු ගුවන් ගමනක්. හිතාගන්නලකො කෂ්ටිය මෙහෙම, මෙල්බර්න් - පර්ත් අතරෙ වෙලාව පැය දෙකහමාරකින් වෙනස්, හරියට රටවල් දෙකක් අතරෙ වගේ. ඉතින් කොහොම රාජකාරියක්ද වියදං අතින් එහෙම බැලුවම අපේ ගෝල මහාචාර්ය තුමා බාර ගත්තෙ. අන්න එහෙමය් පර්ත් කෂ්ටියගෙ වැඩ කිඩ, තමන්ගෙ ගුරුවරයෙකුට, වැඩිහිටියෙකුට, සලකොන කොට එහෙම ඩොලර් එක රුපියලට පේන්නෙ.

මෙල්බර්න් වාසය කොරන, සෙමි රිටයර්ඩ් කියල මං ඉස්සෙල්ලත් කිව්ව, ගුරු පියාණන් ඉතින් පර්ත් චාරිකාවට හෙමීට ලෑස්ති වුනා. තමන්ගෙ ලේඛන කටයුතු එච්චර හදිසි ඒව නෙමේ වුනත් ස්වේච්චාවෙන් කොරන පුවත්පත් වැඩ එහෙම මාසෙකට විතර කොරන්න ලැබෙන්නෙ නැහැ කියල අදාළ කෂ්ටියට කලින්ම දැනුන් දුන්න. යාළු මිත්‍රාදීන්ටත් කිව්ව මෙහෙම ගෝලයෙකුගෙ ආරාධනාව පිට, පර්ත් චාරිකාවකට යනව කියල. පර්ත් වල ඔය කිව්ව දවස් වල ග්‍රීස්ම ඍතුව නිසා, සීතට අඳින ඇඳුම් අවශ්‍ය නැහැ කියල ගෝලය කලින්ම කියල තිබ්බ හින්ද, සැහැල්ලු ඇඳුම් කීපෙකුත් පොඩි බෑග් එහෙකට දා ගත්ත, ටූත් බ්‍රෂ් රෑව්ල කපන ආම්පන්න අරව මේව එක්ක. දැන් ගුරුතුමා ෆුල් රෙඩි ගෝලයගෙ ආරාධනාව පිට පර්ත් ගමන යන්න. ටිකට් එක ලැබුන ගමන් එයාර් පොර්ට් එකට යන්න විතරය් තිබුනෙ.

පලවෙනි සුමානෙ ගතවුනා, දෙවෙනි සුමානෙ බාගෙට ගෙවී ගෙන යද්දී ගුරුතුමා මතක් කරල බැලුව ගෝලය දුරකථන අංකයක් එහෙම දීල ගියාද කියල.....ම්හු...... ඊට පස්සෙ ගෝලය ගැන කිසිම ආරංචියක් වත් නැහැ. මේ වයෝවෘධ ගුරු පියාණන් ලෝක ස්වභාවය තේරුං ගත්තෙ අද ඊයේ නෙමේ. සිද්ධිය අමතක කොරල දාල ඒ මනුස්සය නිකා හිටිය. හැබය් දන්න අඳුනන කීප දෙනෙක් නිකං ඔලොක්කුවට වගේ කාලයක් යනකං කවද්ද පර්ත් යන්නෙ කියල අහපු නිසා, මං මේ දැන් ලිව්ව වගේ, ඒ මහත්තය ලියපු කෙටි කතා එකතුවක නිකමට වගේ කෙටි කතාවක් හැටියට ඔය සිද්ධිය ලියල තිබුන.