'මාර දූතියො'

චිත්‍රය ඇන්දේ 'මට හිතෙන හැටි' සහ 'Hey Dude' ලියන හෙන්රි බ්ලොග් වෝකර් විසිනි

මේ කියන කාලෙ, මහ නගර සභා ලංකාවෙ තිබුනෙ මගෙ හිතේ, අත් දෙකේ ඇඟිලි ගානටත් අඩුවෙන්. මතක ඒව කීපයක් තමා කොළඹ, මහනුවර, කුරුණෑගල, යාපනේ, එහෙම. දැන් නම් ගම්පහත් මහ නගර සභාවක්. මං කුරුණෑගල වැඩ කරන කාලෙ, එහෙ මහ නගර සභාවෙ, ඉලෙක්ට්‍රිකල් ෆෝර්මන් මහත්තයට අයිති, ඉලෙක්ට්‍රිකල් වැඩපොළක් තිබුන.  එයාගෙ පුතාල තමා බිස්නස් එක කරගෙන ගියෙ. ඒ පුතාල, 'තෝර බලයි' සහ බෝතල් දෙකක් ගෙනෙන් මචං' පෝස්ට් වල චරිත නිරූපනය කල ඉන්දරේ සමග හොඳ හිතවත්.

අපේ සෙට් එකේ හිටපු වැඩ කාරයන්ගෙන්, උයාසේන බුන්ට නමින් හැඳින්වුන දයාසේන බණ්ඩා සෑහෙන වැඩ කාරයෙක් වුනාට, ඉන්දරේ ඊටත් වැඩිය හැම අතින්ම වැඩර් කෙනෙක් කියන්න පුළුවන්. මොකද ඉන්දරේට මෝටර් කාර්මික වැඩ වගේම, යන්ත්‍ර සුත්‍ර (ලේත්), වාහන විදුලි, ගෘහ විදුලි, වැඩත් ඒ වගේම චිත්‍ර ඇඳීම, කලාත්මක නිර්මාණ සැලසුම් සහ ඉදි කිරීම වගේ ඒව ගැනත් විශාල දැනුම් සම්භාරයක් එක්ක, උපතෙන්ම ගෙනාපු හැකියාවකුත් තිබුන. අද වෙනකොට පරිඝනක ක්ෂේස්ත්‍රයෙත් සෑහෙන දුරකට ගිහින් ඉන්නෙ.

ඉන්දරේ මට වැඩිය අවරුදු දෙකක් විතර සීනියර්, මට ඉස්සෙල්ල කුරුණෑගල ගිහින් තිබුනෙ. මේ සිද්ධිය වෙනකොට මම කුරුණෑගල ගිහින් නැහැ. අදටත් අපේ සර්කල් එකේ මතක් කරන කතාවක් මේක. ඒ කාලෙත් බිස්නස් කරන අය, තමන්ගෙ ව්‍යාපාරෙ ඇඩ් එකක් විධියට වෙසක් එකට එක, එක, සෙල්ලන් දානව. සමහරු ඔලු බක්කො නටෝනවා වගේ සිම්පල් වැඩකලාට, අර කලින් කියපු ඉලෙක්ට්‍රිකල් වැඩපොළ කරගෙන ගිය කට්ටිය, ඊට වඩා ටිකක් විතර ඇඩ්වාන්ස් වැඩක් ප්ලෑන් කළා. වැඩේ සම්පුර්ණයෙන්ම භාර දීල තිබුනෙ අපේ ඉන්දරේට.

ඉලෙක්ට්‍රික් වැඩපොළ ඉස්සරහ එයාලගෙ ෂෝ රූම් එකේ තමයි වැඩේ ක්‍රියාත්මක වුනේ. මෙතන තිබුනෙ, බුදු රජාණන් වහන්සෙ පියවර කීපයක් වැඩම කරනව. එතකොට තන්හා, රතී, රංගා, කියන මාර දුතිකාවන් තිදෙනා බුදු රජාණන් වහන්සෙ ඉදිරියට ඇවිල්ල නටන්න පටන් ගන්නව. බුදු රජාණන් වහන්සෙ නැවතිලා තමන්ගෙ අත ඔසවල, මෛත්රිය දක්වන හස්ත මුද්‍රාව පෙන්නුම් කරනව. විනාඩි කීපයක් නැටුම ගියාම, ලයිට් ඕෆ් වෙනව, ලයිට් නිමිල තියෙන සුළු වෙලාවෙ හාර්ඩ් බෝර්ඩ් වලින් හදල තියෙන රූප හතරම ආපහු පටන් ගත්ත තැනටම යනව. ආයෙත් ලයිට් එනව, ඉස්සෙල්ල සීන් එකේම ආයෙමත් රිපීට් වෙනව.

කියන කොට ලේසියි වගේ දැනුනට, මේකෙ තිරය පිටුපස වැඩ රාජකාරි හුඟක් තිබුන. සියලුම දේවල් ක්‍රියාත්මක වුනේ විදුලි මෝටර්, මේකටම නිර්මාණය කල ගියර් වීල්, කප්පි සහ විශේෂ නූල් වලින්. ඉන්දරේ තව යාළුවො කීප දෙනෙක් එක්ක සති අන්ත වල, හවස වැඩ ඇරුනට පස්සෙ එහෙම සති හයක් විතර මහන්සි වෙලා තමයි, වෙසක් එකට ඉස්සෙල්ල දවස වෙනකොට යාන්තන් වැඩේ ඉවර කරගෙන තියෙන්නෙ.

දන්නවනෙ ඉතිං තොරන්, මහා කූඩු රාජයො එහෙම ගහන කොට ඔක්කොම කවර් කරගෙනනෙ නිර්මාණය කරගෙන යන්නෙ. වැඩේ කලින් දැක්කොත් ඒකෙ අගය අඩු වෙනවනෙ. මේ වැඩෙත් එහෙමම තමා කෙරිල තියෙන්නෙ. කොහොම හරි වැඩේ ඉවර වෙලා, පලවෙනි පාරට ටෙස්ට් කරල තියෙන්නෙත් ඒ විධියටම තමා, වාසනාවට.

ස්විච් එක ඔන් කලාම බුදු රජාණන් වහන්සෙ පියවර කීපයක් වැඩම කරල නටන්න පටන් ගත්තලු. මර දූවරු තිදෙනා ගල් ගැහිල බලාගෙන හිටියලු.

ප.ලි.

පොඩි නූල් මාරු වීමක් වෙලා තියෙන්නෙ. ඒක හරිගැස්සුවට පස්සෙ වැඩේ නියමෙට ක්‍රියාත්මක වුනා

කියලයි

ආරංචි වුනේ.