"හෑන්ඩ් සිග්නල්"

මේක ඇත්ත කතාවක්, කතානායක ලංගම බස් කොන්දොස්තරගෙ නම මට මතක විදියට නිමලසිරි. අපි නිමල් කියමුකො.

පොර ඒ දවස් වල වැඩ කලේ කුරුණෑගල උතුරු ඩිපෝවෙ. ලංගම කස්ටියගෙ භාෂාවෙන් කියනවනං “උතුරෙ “. පොර ඉස්සර මහණවෙලා ඉඳලත් තියෙනව. ගම වැල්ලව දිහාවෙ වුනාට උසස් පෙළ එහෙම ඉගෙන ගෙන තියෙන්නෙ, මරදානෙ ශ්‍රී ලංකාරාම පිරිවෙනේ. සිවුරෙ ඉන්න කාලෙ හරි කොළඹ පැත්තෙත් කර වෙච්ච පොරක්, කුරුණෑගල උතුර ඩිපෝව විවුර්ත කරනකොට සර්ව රාත්‍රික පිරිතටත් සහභාගී වෙලා තියෙනව, මහන දම් පුරන කාලෙ. (ඩිපෝවේ පිරිතට වැඩම කල එක ගැන වෙනම කතාවක් තියෙනව ඒක පස්සෙ කියන්නං)

නිමල් දවසක් වැඩ, කුරුණෑගල – දඹුල්ල බස් එකක. බස් ස්ටෑන්ඩ් එකෙන් පිටත් වෙනකොටම බස් එකේ කට කපල ලෝඩ් එක, නිමල් දැන් බෙල් තුන ගහල යන්නෙ. බෙල් තුන ගහන්නෙ ඞ්රයිවර්ට සිග්නල් එක, ආයේ සෙනග ගන්න නවත්තන්න එපා, බස් එකේ වෙන ඉඩ නැහැ කියල. ඕනෙ නං මාරයාගෙ හෝරාව ලියන, මාරයාගෙන් අහල බලන්න පුළුවන් ඔය සිග්නල් ගැන. මාරයත් කාලයක් මහන වෙලත් ඉඳල තියෙනව වගේම කොන්දොස්තර ජොබ් එකත් කොරල තියෙනව. උතුර ඩිපෝ එක ගාවට එනකොටත් නිමල් මගීන් ඔක්කොටම ටිකට් කඩල ඉවර නැහැ. කුරුණෑගල, ෆ්ලයින් ස්කොඩ් කස්ටියගෙ කන්තෝරුව තිබුනෙත් කුරුණෑගල උතුර ඩිපෝවෙමය්. බස් එක ඒ හරියට එනකොට නිමල් දැක්ක, අර යුනිෆෝම් නැතුව පනින ෆ්ලයින් ස්කොඩ් ටීම් එකක් ඩිපෝව ඉස්සරහ ඉඳල බස් එකට අත අල්ලනව.

ඞ්රයිවර් ට බ්රේක් එකට කකුල තියන්න හම්බු වුනේ නැහැ නිමල ගැහුව ආයෙමත් බෙල් තුන. නිමල දන්නව මුං කට්ටිය නැග්ගොත් ඌට බඩුම තමා කියල. පැසෙන්ජර්ල බර ගානකට ටිකට් කඩලත් නැහැ, අනික පැසෙන්ජර්ලගෙන් අහපු ගමන් ලැබෙන උත්තරේ, සල්ලි දුන්න ඒ වුනාට,”ටිකට් ලියල දෙන්නන් මගදි, පරක්කු වෙලා තියෙන්නෙ” කියල කොන්දොස්තර කිව්ව කියල. බොරුත් නෙමෙය්.

ඞ්රයිවරුත් නොදන්නව නෙමේනෙ කේස් එක, පොරත් නවත්තන්නෙ නැතුව ඇරල දැම්ම. නිමලත් නිකන් ඉඳපිය. මු ගහගත්ත ටිකට් පොත කිහිල්ලෙ, වං අතේ මාපට ඇඟිල්ලය්, දබර ඇඟිල්ලය් එකතු කරලා රවුමක් හදල, දකුණු අතේ දබර ඇඟිල්ල රවුම ඇතුලෙ එහාට මෙහාට කොරල ටික්කන්ට පෙන්නුවා, අපේ රටේ මෛය්තුන සේවන සිම්බල් එක. (හු# ගනිං කියන හස්ත මුද්රාව)

එදා සේවය අවසන් කොරල ඩිපෝවට බස් එක දාල, සල්ලි එහෙම බැඳලා ගෙදර යන්න ඉස්සෙල්ල නිමල්ටය්, ඞ්රයිවර්ටය් දෙන්නටම ලැබුන විනය පරීක්ෂණයක් පවත්වනතුරු සේවය අත්හිටුවීමේ කොළ කඩදාසි. ඞ්රයිවර් ට චෝදනාව, ෆ්ලයින් ස්කොඩ් ටීම් එකට බස් රථය නොනවත්වා ධාවනය කිරීම, කොන්දොස්තර නිමල්ට චෝදනාව- ෆ්ලයින් ස්කොඩ් ටීම් එකට අසභ්‍ය හස්ත මුද්රාවක් කරලා අපහාස කෙරීම. ඒ වෙලාවට හදපු චෝදනාවක්, මං හිතන්නෙ මීට කලින් කිසිම සේවකයෙකුට ඔය ආකාරයෙ චෝදනා පත්‍රයක් හදන්න නිලධාරීන්ට සිද්ද වෙලා නැතුව ඇති.

ඉතින් විනය පරීක්ෂණය දවසත් ආව. ඞ්රයිවර් නිදහසට කිව්ව, ෆ්ලයින් ස්කොඩ් ටීම් එක යුනිෆෝම් වලින් නෙමෙය් හිටියෙ, ඒ නිසා එයා හිතුවෙ , සාමාන්‍ය මගීන් කියල, කොන්දොස්තර බෙල් තුන ගහල, සිග්නල් කරල තිබුනෙ බස් එකට වෙන සෙනග ගන්න ඉඩ නැහැ කියල. ඒකය් බස් එක නැවැත්තුවෙ නැත්තෙ කියල.

නිමල්ට නිදහසට කරුණු කියන්න වාරෙ ආවම පොර කිව්ව, “මන් දැක්ක සෙනග වගයක් බස් එකට අත අල්ලනව, මං ඒගොල්ලන්ට හෑන්ඩ් සිග්නල් එකකින් කිව්ව බස් එකේ ඇඟිල්ලක් ගහන්න ඉඩ නැහැකියල”

විනය පරීක්ෂණයෙන් දෙන්නම නිදහස්. හිඟ පඩිත් එක්ක ආපහු වැඩ.